شرح الفصل الأول-الصيغ الجزيئية والخبرية-

بنتابع معكن أصدقاءنا بالجزء السادس من شرح الفصل الأول بفقرة الصيغ الجزيئية والخبرية.. من هالفقرة هي غالباً بيورد سؤال دورة وبيكون سهل ومُساعد ان كنت فهمان الفقرة.

باسم الله نبدأ ...

خلصنا بمقالنا الأخير الأرقام المعنوية ووقفنا عند النسبة المئوية للكتلة. 


النسبة المئوية للكتلة :

هون اجاني سؤال دورة أكتر من مرة.. الغاية من هالفقرة إني أوجد النسبة المئوية لكتلة عنصر معين بجزيء ما . 
يعني مثلاً عندي الإيتانول C2H5OH وبقلك عطيني النسبة المئوية الكتلية للهيدروجين.. يعني أديش بتشكل كتلة الهيدروجين من الإيتانول بالمية  

القانون ثابت وبدو حفظ منيح وبصم وتدريب عالتعويض بشكل سريع.. 
القانون بيقول :

النسبة المئوية الكتلية %=100×الكتلة الذرية×عدد مولات عنصر محدد في المركب ÷ الكتلة المولية للمركب  

مثلاً بالإيتانول C2H5OH .. بجزيء ايتانول عندي 6 ذرات هيدروجين.. يعني بمول ايتانول عندي 6 مولات هيدروجين.. والذرات واضحة.. 5 هيدروجين مرتبطة بالكربونتين وذرة مرتبطة بالاوكسجين.. 

الكتلة الذرية للهيدروجين هية 1 ×عدد المولات اللي هو 6 ×100 بيساوي 600
بنقسم على الكتلة المولية للمركب يللي هية مجموع كتل ذراته وتساوي 46g/mol  

بتطلع النسبة المئوية للهيدروجين هية 600×100÷46=13% تقريباً. 

هاد مثال  ولا تفكروا إنو رح ياكل معكن وقت ... باختصار . شوفوا وزن الذرة اللي مطلوبة وكم مرة موجودة واضربوا ب 100 وقسموا ع وزن الجزيء.



الصيغ التجريبية (الخبرية) :

هي نسبة الأعداد الصحيحة الأبسط للعناصر الموجودة في الجزيء ... وهي بتعطيني نوع الذرات الموجودة في الجزيء  . انتبهوا، هية نسبة وأبسط نسبة ... يعني بعطيك جزيء مثلا  C22H24  وبقلك عطيني الصيغة التجريبية لإلو.يعني بتشوف شو أبسط شكل ممكن ينكتب فيه الجزيء .. بتقسم ال24 عال22 . هي نسبة وبتشوفها بأبسط صورة شو بتطلع معك . هون بتطلع C11H12 هي أبسط صورة بينكتب فيها الجزيء السابق . 

لناخد مثال تاني .. البوتان C4H10.. الصيغة التجريبية الو C2H5  .. شايفين ما أسهلها! هي بتجي سؤال دورة .. بيقلك الصيغة التجريبية للبنتن مثلاً هي : وبيحط خيارات . انت بتكون بتعرف شو هو البنتن بعقلك وما بيكتبلك صيغته الجزيئية بس بيطلب منك الصيغة التجريبية 


هاد نمط لسؤال الدورة . في نمط تاني رح نذكرو بعد شوي. 

هلأ عنا نحنا بعض القواعد اللي بتريحنا لإيجاد الصيغة التجريبية بسرعة للمركب المطلوب  هي القواعد بتعتمد على ماهية المركب .

القاعدة الأولى :صيغة مركب أيوني هي دوماً صيغته التجريبية ... يعني شو المركب الأيوني ؟ هو المركب اللي الروابط تبيعتو أيونية . متل NaCl  KCl.... والأمثلة كتيرة ورح نجيه بالتفصيل بالفصل 4...هاد المركب بس شفتو أنا بعرف فوراً إنو صيغتو التجريبية هي نفسها صيغتو الجزيئية .. ما في اختصار ولا كتابة بأبسط نسبة ولا شي 


القاعد التانية :الجزيئات اللاعضوية البسيطة.متل الكربون CO2 بتكون الصيغ الجزيئية والتجريبية غالباً نفسها..
ورح نجي ع شرح الجزيئات اللاعضوية البسيطة بقسم الكيمياء العضوية. 


القاعدة الثالثة :للجزيئات العضوية صيغ تجريبية وجزيئية مختلفة غالباً ... وركزوا ع كلمة غالباً لإن مو دائماً الصيغ بتختلف . 
عنا مثال الميتان CH4 .. هي صيغتو الجزيئية اللي الكل بيعرفها . وهية نفسها الصيغة التجريبية . لذلك قلنا غالباً فوق .

مثال تاني :البروبان C3H8 ما فيني اختصر الصيغة أكتر .. لذلك الصيغة التجريبية والجزيئية هي نفسها. 

مثال تالت: حلقي الهكسان C6H12 هي الصيغة الجزيئية ... أما صيغتو التجريبية هية CH2 .. هون صار في  اختلاف  وهيك بنكون شملنا القاعدة التالتة عالتمام .

هلأ النمط التاني لسؤال الدورة هو بيعطيك كتل العناصر المكونة للمركب وبيقلك عطيني الصيغة التجريبية للمركب.

احفظوا هي الخطوات وطبقوها عالتمارين :

1. بنشوف كتلة كل عنصر عاطيني ياه بالمسألة.
2. بقسم كتلة العنصر ع كتلته المولية اللي كمان بيكون عاطيني ياها. 
3. بقسم نواتج القسمة اللي طلعت معي من الخطوة 2 على أصغر ناتج قسمة طلع معي من الخطوة 2.وهيك بيطلع معي أبسط نسبة للذرات..بس النسبة لازم تكون صحيحة؛ يعني ما لازم تكون الأعداد فيها كسرية 

   وان طلع معنا عدد كسري متل المثال المحلول رقم 8 بالصفحة 9 بالكتاب .. لازم نضرب النواتج لحتى نوصل لأبسط عدد صحيح ..

هون أنا لازم اضرب النواتج (1و 2.5) بعدد بيجعل الناتج صحيح وبأبسط صورة ... يعني العدد هو ال 2
ما بيصير اضرب ب 4 ولا ب 8 ولا بغيرن .. لإن الناتج اللي رح يطلع معي من عملية الضرب هو بيمثل نسبة الذرات ع بعض،بس هي النسبة مانها النسبة الأبسط؛ لذلك ما بيصير اضرب بعدد ما بيعطيني أبسط نسبة صحيحة.وطبعا هاد الشي لإن نحنا طالبين الصيغة التجريبية.