شرح الفصل الأول-الصيغ الجزيئية والمعادلات-

بنتابع معكن بآخر فكرة عن الصيغ التجريبية .

هي الفكرة بتورد بالدورات وأكتر من مرة اجت وحلها سهل وعلامتها مضمونة.. 

بيعطيني النسب المئوية الكتلية للعناصر وعن طريقها بدي أوجد الصيغة التجريبية . 

الحل نفس طريقة حل السؤال اللي بالمقال اللي قبل.،لازم تكون حافظ هال3 خطوات منيح وتعوض بسرعة :

1. قسم النسبة المئوية على Ar العناصر اللي عاطيك ياها 
2. قسم النواتج على أصغر ناتج
3. اضرب النواتج إن كانت أعداداً عشرية بعدد يجعلها أعداداً صحيحة تحقق نسبتها أبسط نسبة .. نفس الحكي اللي حكيناه بالمقال اللي قبل وشوفوا تفسير هالكلام بمثال بالمقال اللي قبل هاد.

الصيغ الجزيئية :

هي الصيغة بتعطيني العدد الفعلي للذرات في الجزيء.. وطبعاً بتعطيني نوع الذرات الموجودة كمان .

وهي بتفيدنا أكتر من التجريبية؛ بنستخدمها لحساب الكتل المولية وعند كتابة المعادلات الموزونة.

مثال : C5H10 هاد البنتن . وهي صيغته الجزيئية .

لاحظوا إنو بهي الصيغة بعرف العدد الفعلي للذرات .. عندي 5 كربون و10 هيدروجين... وبهي الصيغة فيني احسب الكتلة المولية كمان. 

طريقة إيجاد الصيغة الجزيئية :

بنحتاج لإيجادها شغلتين :

1. الصيغة التجريبية للمركب وكتلتها.
2. الكتلة المولية النسبية للمركب .. يعني مجموع كتل ذراته. 

بيكون هو عاطيني الصيغة التجريبية لمركب بدو ياه ويعطيني كمان كتل الذرات المكونة لهاد المركب.

بنطبق هالحكي عالمثال المحلول بالصفحة 10 تحت عاليمين.. هاد المثال حلو وتطبيق مباشر عالفكرة وبيجي ع نمطو بالامتحان ...

عاطيني الصيغة التجريبية وبدي اطلع منها بالصيغة الجزيئية .. نحنا منعرف انو الصيغة التجريبية بنحصل عليها من الصيغة الجزيئية باختصار نسبة الذرات ع بعض ، بنقسم نسبة الذرات على عدد .. متل ال C2H6 بنقسم عدد الذرات ع 2 بيصير عندي CH3 وهي الصيغة التجريبية.. 

طيب أنا بمثالي المحلول بدي العكس، إنو الصيغة التجريبية بدي اوصل عن طريقها للصيغة الجزيئية .. يعني بدي لاقي عدد اضربو بعدد ذرات الصيغة التجريبية لأوصل للصيغة الجزيئية .. (لا تفوتوا بالحيط وتتخربطوا ع كتر ذكر التجريبية والجزيئية 😂)... هاد العدد بيطلع معي من ناتج قسمة الكتلة المولية النسبية للمركب الحقيقي (يعني كتلة الصيغة الجزيئية وهي بيكون عاطيني ياها بالمسألة وما بتنحل المسألة من دونها) على كتلة الصيغة التجريبية يللي أنا بحسبها. 

الشرح مُطوّل بشان يتماشى مع الكل.. حتى اللي عم يدرس لحالو ويتعذب. 

بنجي لنطبق بالمثال المحلول : 

عاطيني الصيغة التجريبية CH2Br وعاطيني كتلة الصيغة الجزيئية 107.8  .. بدي بكل بساطة أوجد كتلة الصيغة التجريبية اللي معي وقسّم..

كتلة ال CH2Br = 12+2+79.0=93.9

هلأ بقسم كتلة الصيغة الجزيئية ع كتلة الصيغة التجريبية 

187.8/93.9=2

بعدين بضرب ال2 بعدد ذرات الصيغة التجريبية وبتطلع معي الصيغة الجزيئية يللي هية  C2H4Br2.

اتدربوا منيح من هلأ ع هدول التمارين .. ما بدن شي، وإنما بدن خفة إيد بالشغل عالآلة الحاسبة... اللي بيتدرب من هلأ بيريّح حالو كتير.