6.1 الصيغ الكيميائية والمعادلات الكيميائية:
بدنا نتعرف بهي الفقرة كيف بنقدر نستنتج صيغة مركب أيوني وصيغة مركب تشاركي.
لمحة عن المركبات الأيونية والتشاركية:
المركبات الأيونية : هي اللي بتتكون من عنصرين مختلفين .. أحدهما يكون أيوناً سالباً والآخر أيوناً موجباً.
الأيون السالب بيكون أيون لا معدني والأيون الموجب بيكون أيون معدني،مثل : NaCl الصوديوم معدن والكلور لا معدن(غاز) .
MgO المغنزيوم معدن والأوكسجين لا معدن (غاز) .
المركبات التشاركية : هي المركبات اللي بتكون فيها الروابط تشاركية .. وبتتم بين اللامعادن غالباً ..
مثالها: Cl2 عندي ذرتين كلور وهنن لا معدنيات
O2 عندي ذرتي أوكسجين وهنن لا معدنيات.
هي لمحة بسيطة استذكارية عن مسميات المركبات . ورح تدرسوهن بالتفصيل بالفصل 4.
هلأ كيف بدي أعرف أنا كيف صيغة المركب الأيوني؟ بمعنى لو قلتلك عندي كلوريد المغنزيوم ، كيف بدك تمثل لي ياه بالرموز؟
هاد الشي بيعتمد على شحنة كل أيون ..
المركب الأيوني بتكون شحنته متعادلة؛ يعني مجموع عدد الشحنات الموجبة وعدد الشحنات السالبة بيساوي صفر.
فبقا شحنة الأيونات هية العامل الوحيد بتحديد صيغة المركب الأيوني .
لناخد مثال : عندي كلوريد الصوديوم .. بدي شوف صيغتو .. بعرف انو بيتألف من أيون صوديوم +Na وأيون كلور - Cl
بس بدي شوف شحنة كل واحد .. الصوديوم شحنته +1
والكلور شحنتو - 1.. المجموع هو صفر . معناها بالمركب بيلزمني بس ذرة صوديوم وذرة كلور لاكتب الصيغة NaCl.
مثال تاني : بروميد الألمنيوم .. بيتألف من البروم Br والألمنيوم Al ،بدي شوف كم أيون من كل عنصر بيلزمني للصيغة.
شحنة الألمنيوم +3 وشحنة البروم - 1... لحتى اوصل للتعادل بيلزمني ذرتين بروم إضافيات مشان تصير 3-3=0 وأوصل للتعادل... معناها الصيغة بتطلع AlBr3.
مثال إضافي : كلوريد المغنزيوم :
الأيونات اللي فيه هية Mg+2 و Cl-1 هي الناقص والزائد هنن أرقام الشحنة .. صعب تنكتب بمطرح كتابة الأس.
مشان اوصل للتعادل الكهربائي بالمركب بيلزمني أيونين كلور وأيون مغنزيوم .. فصارت الصيغة MgCl2.
هاد الحكي علمياً ومشان تعرفوا من وين عم تجي هي الأرقام اللي جنب الذرات بالصيغة وشو بتفسر هي الأرقام.
أما طريقة إيجاد صيغة المركب الأيوني اللي كانت بالإعدادي ويللي بتعرفوها.. المبادلة بين التكافؤات...هي أسرع وبصم😅.
كيف عم نعرف شحنات كل أيون؟
هاد الشي بيعتمد على موقع الذرة بالجدول الدوري .
الجدول الدوري بيتألف من أعمدة (المجموعة) وبيتألف من صفوف أفقية (أدوار)... شغلنا بالمجموعات.
فعلياً بالجدول الدوري عنا 18 مجموعة.. بنبلش فيهن من اليسار لليمين . أول مجموعة بيكونوا عناصرها شحنتن +1
التانية +2 ... بعدين عنا المجموعات من ال3 لل12 هدول اسمن مجموعات العناصر الانتقالية.،ولهم عدة تكافؤات.
المجموعة رقم 13 شحنات عناصرها +3.. وعند هي المجموعة بتخلص المعادن وبتبلش اللامعادن وأشباه المعادن...
كلشي لا معدن شحنة أيونو سالبة... المجموعة 14 الها ما رح نحكي عنها بهالموضع لإن بتجي بعدين .
من المجموعة 15 للمجموعة 17 بتكون الشحنة سالبة وبنوجدها بطرح 18-رقم المجموعة...
يعني مثلاً .. عندي الكلور، بالمجموعة 17 .. شحنتو هية 18 ناقص 17 .. والشحنة سالبة.
معناها ،عنصر من المجموعة 15 شو رح تكون شحنته؟
أكيد - 3.
الأيونات المركبة :هي الأيونات اللي فيها أكتر من نوع من الذرات.. متل أيون الكربونات وأيون الكبريتات وأيون الأمونيوم وأيون الفوسفات... هدول الن شحنات ثابتة لازم تحفظوها وموجودة بالجدول 3.1 بالصفحة 11.
وقت بنسمي المركب الأيوني فلازم نضيف للأيون اللامعدني البسيط(اللي بيتألف من ذرة وحدة) اللاحقة "يد" متل كلوريد الصوديوم ، بروميد البوتاسيوم .. اذا كان الأيون اللامعدني مركب (بيتألف من عدة ذرات) وبقلبو أوكسجين فبنضيف اللاحقة"ات" . متل كبريتات.. كربونات...
كيفية كتابة صيغة المركب التشاركي :
هون بدنا نعرف الذرة المركزية اللي بالمركب كم الكترون بدها... شو يعني ذرة مركزية؟ مثالها الكربون بالميتان CH4... هون الكربون صاير بالمركز وبدو 4 الكترونات لملء الطبقة السطحية اللي عندو .. فبيشارك ب 4 أزواج مع 4 ذرات هيدروجين.
نفس الشي الماء H2O .. الذرة المركزية هي الأوكسجين .
والأوكسجين بدو الكترونين ليملأ الطبقة السطحية اللي عندو لذلك بيتشارك بزوجين من الإلكترونات مع ذرتين هيدروجين.
