التعريف بالوراثة

 

رح بلش من دون مقدمات مشان ما يطول المقال كتير 🙄.

هي المادة من أضخم مواد الفصل الثاني وأصعب مواد هالفصل.. بس بالمقابل هي أحلى مادة بهالفصل إذا ما كانت أحلى مادة بالتحضيرية كلها حتى..

المادة مؤلفة من 16 فصل.. الفصلين 12 و15 محذوفين.. وكلشي كلام مكتوب باللون الأزرق - بالفصلين 14 و16 - كمان محذوف..

راجعوا ملف المحذوفات والتصويبات بهي المادة قبل ما تبلشوا فيها..

مصادر دراسة المادة :

المصدر الأول والأساسي والأخير هو الكتاب..

الكتاب صح منظرو بيخوف شوي.. بس جداً متعوب عليه.. الصور اللي فيه كويسة كتير بشرح الفكر - مع وجود بعض الاستثناءات طبعاً -

تنسيق الكتاب ببعض الفقرات صعب شوي وبحاجة لتركيز كبيير لتقدر تعرف راس الفقرة من رجليها.. لذلك بهي الحالة فينك تلجأ لتنسيق شي فريق وتقرأ منو مشان يساعدك على فك ألغاز الفقرة.. أنا بشوف الآربسيز كان كويس بهي القصة وبيضيفوا إثراءات جيدة لبعض الفقرات لزيادة الفهم..

يعني كتابك هو الأساس.. والفريق بتقرأ منو لتنسق كتابك..

رح تاكل هالشغلة من وقتك لإن أساساً المادة بالوعة وقت 😈

الأمور المساعدة على فهم المادة:

بالمرتبة الأولى بتجي صوتيات الدكتور عبدالرحمن الحلو (اسمي على اسمو 😎😎)

هاد الدكتور بظن كلكن بيعرفه.. انا سمعتله تسجيل الفصل 14 بس وكان كويس.. بظن باقي التسجيلات كمان تكون كويسة..

بالمرتبة الثانية بتجي أعمال الفرق.. كنت بشوف الأفضل - مع عدم التحيز - هنن الآربسيز.. فريق ألفابيت اشتغل محاضرات من عام 2017..شفتله محاضرة للفصل 14 كانت كويسة..

بتبقى أعمال الفرق للاستعانة وليس للدراسة..

الحضور بالجامعة :

إذا كان دكتور المادة كويس وبيفهّم فلازم تحضر بالجامعة.. المادة صراحة صعبة شوي واذا كان في مين يشرحها فهاد الشي بيسهل عليكن كتير..

مستوى صعوبة المادة :

قلنا سابقاً انو هي المادة الأصعب بهالفصل.. فيها الفصول 7 و8 هنن أطول وأضخم وأصعب فصلين بالكتاب... وبيجي منن بحر علامات.. عدد صفحاتن مجموعين هية 78 صفحة.. بيجي منن بين ال20 لل25 علامة، هيك جرت العادة، ويمكن ع دوركن يختلف الحكي متل ما اختلف بالفيزيا والكيميا..

في فصول سهلة، وهية بيولوجيا مع شوية توسع متل ال3 و4 و5 و6.

الفصول الصعبة نسبياً : 13 و14 و11... هدول مستواهن ما كتير صعب.. بس بدن شغل منيح ولو انن ما كتير طوال.. والفصل 14 بيجي عليه علامات منيح.. وكذلك ال11..

ما وقت الحكي عن العلامات هلأ😅.

آلية الدراسة : 

بالبداية المقدمة لا بتقراها ولا بتقرب عليها لإن رح تفهم منها الشي البسيط.. بتدرسا بعد ما تخلص الكتاب.. بتصير كتير سهلة وما بدها وقت.. وطبعاً مطلوبة.. وعدوري ما اجى أسئلة منها.. بس بذكر دكتور كليتنا - لما حضرت محاضرة وحدة لإلو- قال إنو المقدمة مطلوبة.

آلية الدراسة أشبه بالبيولوجيا...بتقرأ الفصل كلو بالبداية.. بتشوف عناوينه الرئيسة والفرعية.. بتاخد فكرة عن كل فقرة.. بعدين بتبلش بالدراسة فقرة فقرة.. بتفهم وبتحفظ.. المادة بدها ال2 سوا.. بدك تفهم منيح وتحفظ منيح..

المادة بتحتاج لدورة؟

 انا وكل فريقي درسنا التحضيرية من دون دورات.. بندرس وبنستعين بالنت كتير.. في عاليوتيوب مليان فيديوهات بتشرح أفكار من الوراثة بشكل عام-بدك تدور عليها.. ما في شي محدد.. الفيديو اللي بيعجبني بفوت عليه-

كان في مقالات ل Khan academy كويسة عالنت بس بالأجنبي.. كنت بشوف الموضوع اللي بدي ياه وبكتب ع غوغل عنوانه وبقرأ.. بالإنكليزي بتلاقي فائدة.. بالعربي نادراً لتلاقي شي بيشرحلك ع غوغل..

علامات الفريق فيها بتتراوح بين ال94 وال98.. وأنا صاحب ال94.. من دون دورة ولا حضور بالكلية والحمدلله.. فما تفكروا المادة شبح لإلكن ويجي حدا يضحك عليكن ويقلكن ما بتمشي إلا بدورة.. بس بالمقابل تعبت عليها كتير لفهمتا.. استعنت بكلشي متاح عالنت او من أعمال الفرق..

بظن تسجيلات عبدالرحمن الحلو تساعدكن كتير كتير.. ما دريت فيها لآخر الفصل وسمعت تسجيل للفصل 14 بس..

إن ما مشيت أمورك بهالمادة بالكلية او لحالك متل ما حكينا فهون بتلجأ للدورة طبعاً مشان ما تضيع حالك..

ما بعرف وين ومين بيعطي دورات كويسة لإن ما بقرب ع هالمجال..

وصاحب ال98 بالوراثة عنا درسها لحالو.. وكانت العلامة الأعلى بالوراثة على دورو..

المادة بتحتاج لمراجعة خلال الفصل؟ 

اي طبعاً بتحتاج.. وكتير ممتاز ازا لحقتها وعدتها خلال الفصل.. بس المهم تكون فهماااان منيح.. مو تروح تعيد المادة 4 مرات عالفاضي وتفكر حالك فهمان🙂 وبالأخير تفرش فيها 💔

أنا ما عدت المادة خلال الفصل.. حتى الفصل 14 تركته لأسبوع المادة.. وبالزور لقدرت عيدا بأسبوعها كونها ضخمة ولإنها آخر مادة بتكون بالجدول.. فالطالب بيفرط وبيمل وهمه بس يخلص.. دير بالك تعمل متلي وتترك شي منها..

فإذا بتعيدا خلال الفصل دور واحد بيكون ممتاز وبتريح حالك..

أهم شغلة إنو بعد ما تدرس الفصل بتقرأ دوراته.. لا تخلي الدورات للأخير..

مستوى أسئلة الامتحان بهي المادة وسط عالدارس وجحيم عالفارش😈..طبعاً اذا كنت دارس صح وفهمان منيح.. يعني بقصد انو بتنجاب المادة معدل حتى لو نكشوها طالما انت فهمان ومخلص الكتاب.. لإن المادة قابلة للفهم بشكل كلي.. ما متل الفيزيا 💔.

ممكن بالامتحان يجيكن بعض الأسئلة الخارجية بشكل كلي...وهون بيشتغل التشليف.. طبعاً بيكونوا سؤال او 2.

كان بدي اكتب لمحة عن كل فصل.. بس هيك رح يصير المقال بدو ساعة قراءة..

لذلك بكتفي بهاد القدر من التعريف..

والله يوفقكن بهالمادة..

صعبة بس حلوة.. وقد ما عطيتها بتعطيك

انا رح اشرح الفصل 7 عالأكيد بإذن الله.. والفصل 8 حسب وضعي الدراسي خلال الفصل اذا كنت ملحق..

والسلام عليكم ♥️🌷