بنبدأ معكن أصدقاءنا بأول شرح بالفصل الثالث.
البنية الإلكترونية البسيطة:
هي البنية اللي بنمثل فيها التوزيع الإلكتروني ضمن المستويات الطاقية الرئيسية،نوى الذرات فيها غير.ظاهرة،والإلكترونات متوضعة ضمن مدارات تخيلية على حسب بعدها عن النواة.
طبعاً هاد النمط من التوزيع (متل اللي موجود بالصفحة 33)هو نمط تخيلي لتقريب فكرة توضع الإلكترونات للأذهان. هاد النمط غير علمي طبعاً وكانوا سابقاً بيستخدموه وهلأ صار ذكرى.
عنا نحنا مستويات طاقية رئيسة بتتوضع فيها الإلكترونات .. طبعاً عدد هي المستويات غير نهائي فيما لو اكشتفوا ذرات ذات أعداد ذرية كبيرة جداً
المستويات اللي معروفة هية 7 وبتاخد الأحرف KLMNOPQ من اليسار لليمين. .
الطبقة K هي الأقرب للنواة،والطبقة Q هي الأبعد عن النواة.
كل طبقة الها طاقة، وكلما كانت الطبقة أبعد عن النواة كانت طاقتها أعلى
كل طبقة بيتوضع فيها إلكترونات (حسب كل عنصر) والإلكترون بيقعد بطبقة ما بناءً عالطاقة اللي بيمتلكها..اذا زادت طاقته انتقل لطبقة أعلى أبعد عن النواة
وإذا نقصت طاقته انتقل لطبقة أدنى أقرب للنواة...
طبعاً بتزيد الطاقة وبتنقص عن طريق امتصاص أو إصدار فوتونات (ما رح نتطرق لهالموضوع كتير لإن مذكور بالفيزيا)
وبالإصدار بيعطيني الضوء .
وكلما زادت طاقة الإلكترون قل ارتباطه بالنواة بحكم ابتعاده عنها وتعرضه لعوامل عدة رح نشوفها بالفصل ..
رمز الطبقات هو n وترتيب الطبقات عددياً بيتم من الرقم 1 اللي بيمثل الطبقة الأدنى وانت طالع.
بكل طبقة في عندي طبقات فرعية، وبظل طبقة فرعية في عندي مدارات رح نتعرف عليها خلال فصلنا.
كل طبقة فيها حد أقصى من الإلكترونات
بنعرف هاد العدد من خلال القانون y=2n^2
حيث y هو عدد الإلكترونات.
n هو رقم الطبقة.
وهيك بيكون عندي بالطبقة الأولى إلكترونين
والطبقة الثانية بتساع 8 إلكترونات
والطبقة الثالثة بتساع 18 إلكترون....
