السلام عليكم ورحمة الله وبركاته.
رح نبدأ معكن أصدقاءنا بشرح الفصل الأول للكيمياء.
بدايةً... الشرح هو لتسهيل الدراسة عليكن و لا يُعتبر بديل للكتاب حتى لو شملنا كل حرف بالكتاب..
الشرح رح يكون باللهجة العاميّة لتسهيل الفهم عليكم.. تُفضَّل قراءة الفصل قراءة سريعة لمعرفة العناوين فقط قبل البدء بقراءة الشرح.
رح يكون تقسيم الفقرات متل تقسيم الكتاب تقريباً إلا اذا اضطُررنا
باسم الله نبدأ..
2.1- كتل الذرات والجزيئات:
الكتلة الذرية النسبية :
العلماء بدايةً، لحساب أوزان الذرات كان صعب عليهن إيجاد جميع أوزان الذرات بنفس طريقة القياس.. لذلك أوجدوا وزن نظير واحد من نظائر الكربون ووجدوا أنو وزنه بيساوي بالضبط 12 واحدة وزن (واحدة الوزن هون مانها غرام.. هي واحدة خاصة بالذرات واسمها واحدة الكتل الذرية ورمزها هو amu.. بتمر معكم بالفيزياء).. وبعد ما تم اتخاذ نظير الكربون معيارا للحساب.. صار حساب اوزان الذرات الباقية بالمقارنة مع الكربون.
يعني مثلاً :وزن الهيدروجين هو 1/12.. وزن الأوكسجين هو 16/12...يعني قد وزن الكربون مرة وثلث.. والواحدة amu
لهيك سموها الكتلة الذرية النسبية.. يعني نحنا بدنا نعرف وزن هي الذرة من العنصر.. بنجي بنقارنها كنسبة مع الكربون.. لإن الكربون هو اللي تم اعتماده بالحساب ولإنه العنصر الوحيد اللي وجدوا كتلته الذرية بتساوي عدد صحيح مو عدد عشري وهاد بيسهل الحساب.
هاد الحكي كان بالبداية وهلأ كلشي محسوب عالدقة.
لما بنحكي عن كتلة عنصر هي كذا (الكلور مثلا 35.5) هاد الشي ما بيعني إنو الكلور وزن كل ذراته هو 35.5... لأ
اذا أخذنا عينة من الكلور رح نلاقي فيها أوزان مختلفة لذرات الكلور.. شي 35 وشي 37.. هاد لإنه أي عينة لعنصر ما في الطبيعة هي مؤلفة من نظائر لهاد العنصر.. وبنعرف إنو النظير هو الذرة نفسها لكن باختلاف عدد النيوترونات الموجودة بنواة هذه الذرة.. ومع اختلاف عدد النيوترونات بيتم في اختلاف بالكتل بين الذرات لنفس العنصر... لهيك مشان نعتمد وزن معين تم حساب الوسط الحسابي لمجموع ذرات العنصر (كل النظائر بأي عينة معيارية) وكان الوزن الوسطي (الكتلة الوسطية) لأي ذرة كلور هو 35.5...
طيب ليش ما 36 طالما ذاكرلي يا استاذ إنو في عندي نظيرين؟؟
الجواب هو 35.5...لإن أنا ما عندي نص العينة كلور 37 والنص التاني كلور 35... لأ.. عندي ثلاثة أرباع ذرات العينة 35 والربع الباقي هو 37.. لذلك بحسبة بسيطة (صف ثامن😉) بيطلع الناتج هو 35.5.
الحكي السابق عن النظير اجى بسؤال دورة.
تسمية النظائر :هية 3 طرق للتسمية مذكورة عندك بالمنهاج بتعتمد على رقم الكتلة (عدد النوكليونات)... وطريقة من الطرق جاية بسؤال دورة "السؤال كان على الشكل:أي طريقة هي صحيحة لكتابة النظير Ca" وكانوا حاطين طرق جديدة غير صحيحة.. بتختار اللي بمنهاجك.
الكتلة الجزيئية النسبية:
هي مجموع كتل الذرات الموجودة في الجزيء.
طبعاً هاد التعريف بنستخدمه للمركبات ذات الروابط التشاركية... ويللي ما بيعرف شو هي المركبات ذات الروابط التشاركية أو نسيان شو هية...رح نورد هالحكي بالفصل الرابع ان شاء الله.
أمثلتها كتيرة :CH4, CO2, Cl2, O2...
كتلة الصيغة النسبية :
هي مجموع كتل الذرات الموجودة في الجزيء.
وهاد التعريف خاااص فقط بالمركبات ذات الروابط الأيونية (المركبات التشاردية) .. أمثلتها كتيرة مثل : NaCl, MgCl2, NaOH ....
