العوامل المؤثرة في طاقات التأين

العوامل الثلاثة التي تؤثر في طاقات التأين:
1. مقدار الشحنة النووية :

عموماً ... وضمن الدور نفسه، كلما زاد العدد الذري بتزداد عندي طاقة التأين .
ليش هيك طيب؟ قال لإن بالدور الواحد (الصف الأفقي) بتكون الإلكترونات ضمن الطبقة الطاقية السطحية نفسها عند كل العناصر... فبقا كلما زادت شحنة النواة بزيادة العدد البروتوني فهاد الشي رح يزيد التجاذب بين النواة والإلكترونات، فبقا بيصير صعب إني انتزع الإلكترونات إلا بزيادة الطاقة المُقدّمة للانتزاع (طاقة التأين)
خدوا مثال لتفهموا:
بالجدول اللي بالصفحة 35 .. عندي العناصر اللي بدور واحد هنن من ال Li حتى Ne .. شوفوا طاقة التأين الأول لكل إلكترون كيف عم تزداد مع ازدياد الشحنة.

2. بُعد الإلكترونات الخارجية عن النواة:

كلما زادت المسافة بين الإلكترونات والنواة قلت قوة التجاذب .. هاد الشي بيخلي طاقة التأين تصير أقل لإن النواة ما عم تشد الإلكترونات البعيدة لعندها كتير
فبقا الإلكترونات السطحية هيي أقل انجذاباً للنواة من الإلكترونات اللي بالطبقات العميقة....وهيك بتكون طاقة التأين للإلكترونات السطحية هيي أخفض من طاقة التأين للإلكترونات العميقة.
معناها العلاقة بين بعد الإلكترونات عن النواة وطاقة التأين هي عكسية.. كلما زاد البعد قلت طاقة التأين وبالعكس..



3. مفعول حجب الإلكترونات الداخلية :

هلأ نحنا بنعرف إنو الإلكترونات بتتوزع وفق سويات طاقية أساسية حول نواة الذرة .. يعني بتسكن طبقات حول الذرة.
هلأ اذا عندي الطبقة K فيها إلكترونين والطبقة L فيها فيها 5 إلكترونات مثلاً.. صارت عندي الترتيبة بالذرة هية
نواة موجبة الشحنة، إلكترونات سالبة بالطبقة K، إلكترونات سالبة بالطبقة L ..

هلأ صار في عنا شحنات متماثلة بالطبقة K والطبقة L .. هدول الشحنات(الإلكترونات) رح يتنافروا.. هاد الشي بيخلي الإلكترونات الداخلية(اللي بالطبقة K) تمنع الإلكترونات الخارجية (اللي بالطبقة L) من تحسس كامل الشحنة النووية .. يعني بتخلي التجاذب بين النواة والإلكترونات الخارجية أضعف وهاد الشي بيخلي طاقة التأين للإلكترونات الخارجية أضعف.