تفسير طاقات التأين المتتالية :
المنحني الموجود بالشكل 4.3 بالصفحة 36 بيمثل لي طاقات التأين المتتالية للصوديوم بدلالة عدد الإلكترونات المنتزعة.
بدنا نطبق ع هاد المنحني العوامل المؤثرة بطاقات التأين.
أولاً، لازم نعرف إنو الصوديوم عندو 11 إلكترون، يعني عدده الذري 11 - حطوها ببالكن- بيتوزعوا وفق 3 سويات طاقية رئيسة هنن K L M
ال K فيها إلكترونين وال L فيها 8 إلكترونات وال M فيها إلكترون وحيد.
عند انتزاع أول إلكترون رح تكون طاقة التأين المُقدّمة صغيرة، هاد الشي بيدلني إنو الإلكترون بعيد عن النواة ومتعرض لمفعول حجب من قبل الإلكترونات الداخلية اللي بطبقات أقرب للنواة؛ فهاد الشي رح يخفف قوة التجاذب بين النواة والإلكترون الخارجي، فبيصير الانتزاع سهل وما بيعذب.
عند انتزاع الإلكترون الثاني بنلاحظ صار في قفزة بالطاقة المقدمة للانتزاع .. هاد الشي بيدلني إنو هاد الإلكترون هو بطبقة أقرب للنواة من الإلكترون السابق،فصارت قوة الجذب أكبر بين النواة وهاد الإلكترون، مما استدعى تقديم طاقة أكبر للانتزاع .
باقي الإلكترونات لحتى تاسع إلكترون انتزاعها ما بيترافق بزيادة كبيرة .. صح بدها طاقة كبيرة بس ما في قفزات كبيرة بين كل طاقة وطاقة تانية .. هاد الشي بيعني إنو هي الإلكترون واقعة بنفس الطبقة على نفس البعد عن النواة.
آخر إلكترونين هنن بالطبقة الأقرب للنواة (الطبقة K)
الانتزاع بدو طاقة جداً كبيرة (طاقة التأين جدا كبيرة)
لإنن قريبين للنواة وما في أي طبقات إلكترونية تانية لتسبب حجب لهي الإلكترونات.
هلأ الغاية من استعمال طاقات التأين المتتالية :
- التنبؤ بالتشكيل الإلكتروني البسيط أو التحقق منه (وشرحنا شو يعني تشكيل بسيط بأول مقال بالفصل)
- معرفة عدد الإلكترونات السطحية للعنصر ومن ثم تعيين المجموعة التي ينتمي لها العنصر . يعني بس عرفت عدد الإلكترونات السطحية فوراً بعرف رقم المجموعة اللي بينتميلها العنصر، وبيكون رقم المجموعة موافق لرقم الإلكترونات السطحية.
كيف بيجي سؤال الدورة غالباً؟
غالباً بيعطيك جدول فيه طاقات تأين متتالية متل اللي موجود بالصفحة 36 والصفحة 37 باختبر معلوماتك وبيقلك حدد لي لأي مجموعة بينتمي هاد العنصر.
بكل بساطة (بس عالسريع كمان) بتعمل نظرة عن طاقات التأين وبتشوف وين صار في قفزة عند أي طاقة..
يعني مثلاً باختبر معلوماتك الصفحة 37 رقم 4
عندك 6 طاقات تأين متتالية .. أول 4 طاقات من عاليسار متقاربات، الطاقة الخامسة كتير فيها فرق عن اللي قبلها .. معناها صرنا بطبقة أقرب للنواة .. يعني الإلكترونات السطحية هية 4 وبالتالي بينتمي العنصر للمجموعة الرابعة.
