بنتابع معكن أصدقاءنا بالجزء الثالث من الفصل الأول.
رح نحكي بهاد المقال عن المولات وكل ما يتعلق بالكتل مع التنبيه على مستوى سؤال الدورات الذي يأتي من هذه الفقرة.
باسم الله نبدأ...
4.1 كمية المادة :
شو هو المول؟.. هو واحدة لقياس كمية المادة.. وبيساوي ثابت أڤوكادرو من المادة.
شو يعني هالحكي فوق وليش صار في شي اسمو مول؟🤔
العلماء لما أرادوا وزن الذرات بسهولة وتحويل واحدة الوزن من ال amu إلى الغرام كان لا بد عليهم من أخذ عدد كبير من الذرات، فما بنقدر نحن نوزن 10 ذرات ولا 100 ولا 1000 ونحط الواحدة غرام.. لازم نوزن عدد كبير جداً من الذرات وبنشوف هاد العدد أديش بيعطي وزن بالغرام.. هاد العدد كان هو ثابت أڤوكادرو اللي اعتمدوه العلماء، وسمّوا كمّية المادة الناجمة عن عن تجمع هاد العدد الكبير من الذرات "المول".🤗
وبالحساب وجدوا إنو الكتلة المولية(الذرية مقدرة بالغرامات) تساوي الكتلة الذرية النسبية اللي شفناها بأول الفصل
يعني نحنا كان عنا Ar(H) = 1.0 amu
وكمان عنا الكتلة المولية للهيدروجين (رمزهاM) بتساوي1g/mol.
الخلاصة : عندي 1mol من مادة ما فمعناها عندي 1×L من ذرات هي المادة.... حيث L هي رمز لثابت أڤوكادرو اللي بيساوي 6.02×10^23 ذرة من هي المادة.
هلأ عدد أڤوكادرو (وبيطابق مول واحد من المادة) فيننا نطلقه على الذرات أو الجزئيات أو الأيونات أو الإلكترونات.. يعني فيني قول إنو عندي مول واحد من جزيئات الكلور.. أي أنا عندي عدد أڤوكادرو من جزيئات الكلور..
ركزوا معنا بهالنقطة هي وكتير مهم تفهموها منيح 🤕وتتمرنوا عليها
عنا نحنا جزيئة كلور وحدة، كم ذرة كلور فيها؟ فيها ذرتين صح؟
طبعاً، لإن الكلور رمزه Cl2 والرقم 2 بيعنيلي إنو في عندي ذرتين كلور وبيناتن رابطة تشاركية.
طيب إذا قلت لحالي.. عندي مول من "جزيئات" الكلور، معناها كم جزيئة كلور عندي؟😐 الجواب :عندي عدد أڤوكادرو من جزيئات الكلور.
طيب سؤال تاني... عندي مول من "جزيئات" الكلور، معناها كم "ذرة" كلور عندي؟🤔🤔 الجواب :عندي 2×عدد أڤوكادرو من "ذرات" الكلور... يعني عندي مولين من ذرات الكلور... وهي الفكرة بيجي بالدورات على نمطها منيح..
ما عم تفهم صديقي ع هالتوضيح هاد فإنت ما رح تفهم كتابك كلو من أساسو إذا ما عم تفهم😅.. لإن أبسط من هيك ما في 😂.
بناخد مثال تاني.. عندي جزيء HCl.. أخدت مول من جزيء حمض كلور الماء،معناها كم جزيئة حمض كلور الماء عندي؟
مبينة 😏.. عدد أڤوكادرو من الجزيئات
طيب السؤال الأهم.. كم مول من أيونات الهيدروجين عندي وكم مول من أيونات الكلور عندي؟ الجواب:عندي مول من كل أيون.
المولات والكتلة :
الغاية من كل حكي الكتاب بهي الفقرة إنو يقلك.. أنا أخدت كذا غرام من هي المادة.. معناها أنا أخدت كم مول من هي المادة؟؟
يعني الحكي بالكتاب كلو مشان تعرف بس توجد عدد المولات n.
وبتتذكروا قانون عدد المولات اللي مر معكم بالبكالوريا يللي هو:
N=m/M
حيث : m كتلة المادة بالغرامات (الكتلة اللي بناخدها وقت التجربة... مثلا أخدت من الكربون 6 غرامات بس) الواحدة g
M الكتلة المولية للمادة (الكتلة المعيارية.. يعني وزن عدد أڤوكادرو من هي المادة) الواحدة g/mol.
وهيك بنعرف عدد المولات اللي عنا... مثال:
عندي 24 غرام من الكربون أنا.. فكم مول عندي؟
واضحة وشغل صف تاسع بالكتير 🙂.. بطبق القانون وبيطلع عندي مولين من الكربون.
وبعرف أنا إنو وزن مول واحد من الكربون بيساوي 12 غرام..
ممكن يسألك ويقلك.. عندي 3.01×10^23 من الكلور... فكم الوزن الغرامي للعدد السابق؟
بتعرف مباشرة إنو عاطيك هو نص عدد أڤوكادرو.. يعني عاطيك نص مول.. والمول بيساوي 35.5.. معناها النص بيساوي... احسبوها لحالكن 😁.
هيك بيكون خلص مقالنا.😍😍. بنتمنى إنكن استفدتوا.
والسلام...♥️
