بنتابع معكن أصدقاءنا بالجزء الثاني من شرح الفصل الأول للكيمياء.. الجزء الأول ل يللي ما شافه من هنا.
3.1 الكتل الذرية النسبية الدقيقة:
شو الفرق بينها وبين الفقرة بداية الدرس (الكتل الذرية النسبية)؟
الكتل الذرية النسبية (دون كلمة الدقيقة) قائمة على تقدير الوزن بالمقارنة مع الكتلة الذرية لنظير الكربون_12 المعياري.
أما الكتلة الذرية الدقيقة فهي من دون المقارنة مع الكربون، وإنما باستعمال جهاز يُعرف باسم "مطياف الكتلة"
يعني أنا بدي جيب عينة من هالعنصر الفلاني واقعد لاقي الكتلة الذرية بدقة بالغة لهذا العنصر..
مطياف الكتلة :
مبدأ عمل الجهاز ما كتير مهم بس المهم تفهموا الحكي الموجود بالكتاب..
بدايةً.. بنجيب عينة من عنصر الرصاص مثلاً (بنقصد بالعينة إنو كمية او مجموعة من الذرات ولتكن 1000 ذرة على سبيل المثال لا الحصر).. - تابعوا معنا على الشكل 3.1 بالكتاب-
في البداية عنا سلك مسخن بيعطيني إلكترونات.. أنا بكون حاطط العينة بحجرة التأين (يللي رح تتحول فيها الذرات لأيونات).. الغاية من الإلكترونات عالية الطاقة هي استهداف الذرات الموجودة في حجرة التأين، وهاد الشي بيأدي لفقدان الذرات لإلكترون في الطبقة المدارية السطحية بسبب قوة التنافر بين الإلكترون المُستهدِف والإلكترون المُستهدَف... وهيك بتتحول الذرات لأيونات موجبة.
بعدين هي الأيونات رح ابعتها ع مكشاف ل يكشفلي هي الأيونات شو وشو أعدادها الكتلية.. طبعاً بيتم تسيير الأيونات بواسطة حقول مغناطيسية قوية وهاد سؤال دورة.
في عبارة بالكتاب بتقول :"كلما ازدادت شدة الحقل المغناطيسي ازداد وصول النظائر الأكثر ثقلاً إلى المكشاف" شو يعني هالحكي وليش في نظائر أثقل من نظائر طالما أنا عندي الرصاص نفسو؟؟!
الجواب:قلنا بالدرس السابق إنو اي عينة لأي عنصر هي عبارة عن مجموع نظائر مختلفة لهاد العنصر.. وكل نظير إلو وزن معين بحكم اختلاف العدد النيوتروني بين النظائر... لهيك في نظائر أثقل من نظائر أخرى ولنفس العنصر.
هاد الحكي اللي فوق هو بس لتفهموا مبدأ عمل مطياف الكتلة.
الغاية من مطياف الكتلة هي:
1-قياس كتلة كل نظير موجود في عنصر ما
2-إظهار الوفرة النسبية لكل نظير
3-حساب الكتلة الوسطية الذرية الدقيقة عن طريقه.
معنى الحكي اللي فوق (والخيارات جاية سؤال دورة - بما معناها-) إنو انا وقت بستخدم مطياف الكتلة رح يعطيني وزن كل نظير طلع عندي ورح يشوفني أديش في كمية من هاد النظير بالعينة كنسبة مؤية.. وبناء على هالمعطيات رح احسب وزن الذرة الدقيق.
نتائج عمل مطياف الكتلة بتظهر بمخطط اسمه "مخطط طيف الكتلة للعنصر فلان"
هاد المخطط محبب بالدورات وكتير بتجي أسئلة عليه ..
رح نناقشه....
تبعوا معنا عالشكل 5.1 للنيون..
عندي على المحور الأفقي شي اسمو نسبة الكتلة إلى الشحنة m/e.. هي النتيجة بتعطيني عدد النوكليونات بكل نظير ناتج عندي من المكشاف.. يعني عطتني البند الأول المذكور فوق بفقرة"الغاية من مطياف الكتلة"
وعالمحور الشاقولي في عندي الوفرة النسبية.. يعني أديش متوفر من كل نظير... عنا النيون بالشكل، بنلاقي فيه إنو النظير اللي عدد نوكليوناته 20 في منو بنسبة 90.9% من العينة كلها
والنظير _21 في منو 0.3%
والنظير_22 في منو 8.8%
معناها أكتر شي عنا نحنا موجود النيون 20.
هدول المحورين كتير هامين وكذا مرة اجوا دورات والعالم بتفوت فيهن بالحيط لإن ما في دقة بالدراسة.
لسا في عنا كم مصطلح مهم بخصوص طيف الكتلة ويللي هنن:
عدد القمم :هو عدد النظائر اللي طالع عندي بالطيف(هدول الخطوط الحمر او البرتقالية)
النظير الأثقل :هو صاحب العدد الكتلي الأكبر وليس صاحب الوفرة الأكبر
النظير الأخف :هو صاحب العدد الكتلي الأقل وليس صاحب الوفرة النسبية الأقل.
هدول المصطلحات كتير بيصير فيهن خلط وخربطة والطلاب بيوقعوا فيهن غالباً.
بنجي للغاية الأخيرة والأساسية من مطياف الكتلة ويللي هية حساب الكتلة الذرية الدقيقة.. بسيطة
بنضرب كل كتلة نظيرية بالوفرة النسبية لكل نظير وبعدين بنجمع الأعداد اللي طلعت معنا وبنقسم على 100 وخالصين..
شوفوا أمثلة الكتاب المحلولة واتدربوا عليها.. جاية دورات
والحكي المذكور بخصوص الأرقام المعنوية رح نشرحه بفقرة الأرقام المعنوية..
بنتمنى تكونوا استفدتوا من هالشرح هاد.. وبالتوفيق ان شاء الله.
