رح نرجع نعيد معكن فكرة المولات بإسهابات طويلة وشرح مُفصل عالأخير.
أولاً.. رح نحكي عن الذرة والجزيء..
الذرة :أصغر جزء من العنصر.. مثالها :الأوكسجين O،الكلور cl، البروم Br، اليود I ،الهيدروجين H والأمثلة كتيرة.
الجزيء : هو اجتماع ذرتين أو أكثر من نفس العنصر أو من عنصرين مختلفين.. أمثلة : جزيء الأوكسجين O2 ،جزيء الهيدروجين H2، جزيء كلوريد الصوديوم NaCl هدول عنصرين مختلفين، جزيء الكلور Cl2، جزيء حمض الفوسفور H3PO4.
بنجي هلأ لفكرة المول.. ما رح نحكي كيف العلماء اتطرقوا لفكرة المول ولشو استخدموها لإن هاد الشي حكيناه بالمقالات اللي قبل.
المول : هو وحدة قياس لكمية المادة، بيقيسلي أديش في عندي من هي المادة... ممكن المادة تكون إلكترون.. أيون.. ذرة.. جزيء...
يعني فيني قول عندي مول من الذرات أو فيني قول عندي مول من الجزيئات أو مول من الإلكترونات أو مول من الأيونات..
هلأ هاد المول قلنا بيدل ع كمية.. وهي الكمية اسمها عدد أڤوكادرو L (مشان العالم اللي ما بتعرف شو هاد ال L) رمز أڤوكادرو هو L يا عالم.
يعني عندي :عدد أڤوكادرو هو بيساوي واحد مول وبيساوي 6.02×10^23 واحدة من المادة... ممكن تكون المادة جزيء فبكون عدد أڤوكادرو هو عدد الجزيئات... ممكن تكون المادة ذرات فبكون العدد L هو بيدل على عدد الذرات.. وهيك للأيونات والإلكترونات وغيرن..
تمام؟... يعني مول واحد بيساوي عدد أڤوكادرو.. هي حطوها ببالكن.
تنويه: الإشارة ^ تعني أُس.
هلأ بنرجع لموضوع الذرات والجزيئات..
عندي جزيئة ال O2 ،الرقم 2 بيعني إنووعندي ذرتين أوكسجين.
عندي جزيئة Cl2، الرقم 2 كمان بيعني إنو عندي ذرتين كلور.
عندي حزيئة H3PO4 هاد بيعني إنو عندي 3 ذرات (الأفضل هون نقول أيونات وبتعرفوا ليش يبقى بالفصل 4) من الهيدروجين، وذرة فوسفور و 4 ذرات أوكسجين.
طيب... أنا عندي جزيئة أوكسجين، يعني عندي 1 من O2.
لو قلت عندي مول من جزيئات الأوكسجين معناها عندي 6.02×10^23 جزيئة O2.. يعني عندي عدد أڤوكادرو من جزيئات الأوكسجين.
وعلى اعتبار إنو كل جزيئة أكسجين فيها ذرتين أوكسجين
معناها كل مول جزيئات أوكسجين بقلبو مولين ذرات أوكسجين.
يعني كل 1L من جزيئات الأوكسجين بقلبها 2L من ذرات الأوكسجين (قولولنا هلأ شو يعني ال L مو 😑😑😑😒)
يعني كل 6.02×10^23 جزيئة أوكسجين فيها 12.04 ×10^23 ذرة أوكسجين...
المفهومات المرادفة : المول بيعني عدد أڤوكادرو وبيعني 6.02×10^23.
اذا قلتلك عندي 3.01×10^23 جزيئة من مادة ما.. معناها أنا عندي نص عدد أڤوكادرو.. معناها نص مول.
لا تسألونا كيف حسبناها.. مبينة وطالب صف ثاني بيقدر يحسبها... عيب 😏.
واذا قلتلك عندي 2.01×10^23 جزيئة مثلاً من مادة ما فأنا عندي ثلث عدد أڤوكادرو من هي المادة يعني ثلث مول.
طبعاً الأرقام بالكيميا دائماً فيها تقريب ولحد يقللي هاد مو ثلث والثلث اللي كاتبو غلط... بدكن تتعاملوا مع لغة التقريب كتير بالكيميا.
طيب هلأ بنجي لكم تمرين... مع شرحهم.. عشانكم بس 😁.
عندي مول من الأوزون (احفظوا رمز الأوزون هو O3.. يعني كل اوزوناية فيها 3 ذرات أوكسجين.. وهون ما بيلزم قول قبل كلمة الأوزون انو عندي جزيئة أوزون.. لأ.. بكتفي بكلمة أوزون لإن معروف إنو الأوزون هو جزيء وليس ذرة).
بنرجع للحديث... عندي مول أوزون يعني عندي 3 مولات من ذرات الأوكسجين... ونفس الشي اذا قلتلك عندي 1L من الأوزون معناها عندي 3L من ذرات الأوكسجين... ونفس الشي اذا كتبتلك عدد أڤوكادرو.
طيب... عندي نص مول من الأوزون يعني عندي 1.5 مول من ذرات الأوكسجين..
طيب... عندي نص مول من جزيئات الكلور Cl2.. معناها عندي مول واحد من ذرات الكلور Cl.
راجعوا دائما مفهوم الذرة والجزيء..مفهوم؟
والسلام عليكم.
