نصائح عامة لدراسة البيولوجيا 2

بتابع معكن أصدقائي بالجزء التاني من مقال البيولوجيا الامتحاني.

المواضيع اللي رح ناقشها هية :

1- درسنا ومن وين بدنا نراجع؟
2- شو الأفضل نساوي بهي الفترة؟ نحل بنوك وأتمتات ودورات ولا بس دورات؟
3- شو مدى فائدة الملخصات اللي عم نسمع فيها؟
4- ايمت بضطر لملخص؟
5- شو بعمل اذا ضل عليي كم فصل وما درستن؟
6-بيوم الجمعة (قبل المادة بيوم) أنو أفضل راجع اللي درستو خلال أسبوع المادة ولا ادرس شي جديد؟
7-معقولة الحق راجع 400 صفحة بيوم الجمعة؟

8-كيفية التعامل مع الورقة الامتحانية

رح بلش فيهن حبة حبة.

1-خلال هي الفترة مراجعتك بتكون من مصدر درستك الأولي.. ان كنت دارس من الكتاب فلا تغير ع المحاضرات نهائياً مشان ما تتخربط... ان كنت دارس من المحاضرات فخليك عليهن كمان مشان ما تتخربط.

2-الدورات بالمرتبة الأولى واذا زاد معك وقت فلا مانع من انك تحل كم سؤال أتمتة من شي بنك.. ولا تصدق إنو في بنك بيولوجيا بيضمنلك تجيب علامة عالية هو لحالو.

3-الملخصات والنقاط هنن مانن بهالفائدة العظمى.. هنن خيار اسعافي فقط.. الملخص عبارة عن حذف لحشو الكتاب اللي مانك مضطر لتحفظو.. بس هاد الحشو تبع الكتاب مفيد لفهم الفكرة.. والملخص ما بيساعد بفهم الفكرة.. محطوط للبصم فقط
النقاط الذهبية  هية بنفس الأسلوب بس عبارة عن وضع الفكر ضمن بنود.
النقاط والملخصات لحالها ان ما كنت فهمان ما بتجيب علامة قطعاً قطعاً... ان كنت فهمان فكلام الملخص بيفيدك.
هدول الخيارات بتلجأ لإلن بالأخير  وقت بتفرش عالأخير وانت مانك دارس شي كم فصل... طالما عندك وقت فكتابك بيخليك تجيب 100.
ماني عم اطعن بأي حدا.. عم انقل اللي بعرفو بكل أمانة.

4-جاوبت ع هالسؤال بالبند 3.

5-هون انت في عندك عدة خيارات... بتقرأ الفصل قراءة سريعة وبتفهمه.. بتفتح ع أسئلة الدورات وبتشوف الأسئلة اللي اجت منو وبتدرسها.. بعدين بتدرس فقرات الدورات.. يعني مثلاً هاد السؤال اجى من هي الفقرة فبتدرس الفقرة كلا..
او فينك تفتح ملخص للفصل او النقاط الذهبية بس بعد ما تقرأ الفصل بالبداية مشان تفهم عن شو عم يحكي لإن الملخصات والنقاط ما فيها هي الميزة 🙃.. لو بدها تفهمك شو في بفصلك فهون بتصير بقد كتابك😏.

6-الأفضل بيوم الجمعة تراجع اللي درستو بشكل سريع.. بتقلب الصفحات تقليب وبتشوف الفكر بنظرة سريعة.. والشي اللي انت  شفتو صعب عليك وقلتلك تحددو بالمقال اللي قبل فهاد بتراجعو منيح.

إن بقي معك وقت بعد ما تراجع وتحل الدورات فهون فينك تدرس وتستغل وقتك.. لا تترك أي كلمة بالكتاب من دون ما تقراها... ممكن يجيك السؤال سهل من شي فصل مانك دارسو.. بس مع الأتمتة بتقدر تتذكر المعلومات وتحل اذا كنت قاريه عالأقل... لهيك لا تترك شي حتى لو بدك تقراه قراءة.

7- انت ما رح تقعد تراجع ال400 صفحة 

بحرفيتهم...مابتقعد بتقرأ الصفحات من جديد لإن فعلاً ما رح تلحق تعيد... بتقلب صفحاتك وقليب وبتراجع الأفكار اللي فيها بشكل سريع جداً.. واللي مانك متقنو بتوقف عندو وبتراجعو.. يعني الفصل ما بياكل معك ساعة بهي الطريقة.
لا تفكر بعد ما راجعت كتابك كلو خلال هالفترة ووصلت ليوم الجمعة انك تغير كتابك وتروح ع شي ملخص مشان تراجع بهاليوم اللي ضل... ترا رح تتخربط.. بتضل ع كتابك طالما انت حافظو وحافظ شكل صفحاته وكاتب عليه بخط إيدك... مشان ما تتخربط الذاكرة البصرية تبعيتك وتضيع حالك.
واللي بيقلك لازم تشتري ملخص مشان تراجع منو بيوم الجمعة فهاد بيكون عم يضحك عليك وبنفس الوقت حابب يبيعك سلعته بأسلوب نصبيّ جميل 😊...
أنا وكل رفقاتي ما بنعرف شو هي الملخصات وكلنا جبنا بالبيولوجيا علامات فوق ال90.

8-الموضوع الأهم😎

أول ما بتطلع من بيتك قبل بساعة من الامتحان وبتتعرف ع قاعتك ومقعدك (إن كان بالمدرج او بمخبر او غيرو) ما بتراجع ولا معلومة مع رفيقك مشان ما تتلبك.. راجع لحالك ازا بدك.. وازا شفت مخك تعبان وما عم تتذكر شي فلا تخاف.. رح تشوف السؤال قدامك والخيارات قدامك وعليك تميز الصح من الخطأ....

النوم قبل الامتحان شي 6 ساعات موضوع جداً مهم وضروري مشان ما تخبص بالأسئلة... أنا ما كنت بنام هالكمية قبل الامتحان وبنام سويعات لإن ما بكون ملحق.. بس هاد الشي رجع بضرر عليي.

بتفوت عقاعة الامتحان ومعك قنينة مي (للضرورة)
وبتاخد معك قلم رصاص B2 (لا تاخد ال HB تبع أيام الطفولة 🙄) وقلم أزرق ومحاية.. 

أول مادة رح تتوتر بشكل طبيعي.. بس لا تزيد توترك.. بس تستلم الورقة وتحل اول 5 أسئلة رح يروح كل التوتر. 

ما بتنسى بطاقتك الجامعية وهويتك طبعاً. 

بيبلشوا بتوزيع الأوراق... بتكون الأسئلة عبارة عن 4 أوراق وورقة إجابة وحدة(بظن غالبيتكن شافها عالفيس لورقة الإجابة)
الأوراق مخروزين ببعض من فوق عاليمين او اليسار.. وورقة الإجابة أول ورقة.
ورقة الأسئلة بتكون مقسومة بشكل طولي بخط.. وفيها شي 12 سؤال تقريباً بكل وجه او أكتر او أقل..
بتاخد الورقة وبتعمل نظرة سريعة جداً على عدد الأسئلة وبتتأكد انن 100 سؤال قبل ما تبلش تحل شي (مشان اذا في نقص يبدلولك الأوراق لإن بعدين ما بيبدلوا وبتروح عليك المادة).. مو تقعد تعد الأسئلة سؤال سؤال.. لا فوراً نظرة سريعة وبتتأكد من وجود السؤال رقم 100 والختم اللي بآخر ورقة الأسئلة.. وبتتأكد من وجود كلمة انتهت الأسئلة.. هدول كلن ما بياكلوا معك كم ثانية لا تتلبك عزيزي.

بترجع  لورقة الإجابة. بتلاقي فوق عاليمين مكان كتابة بياناتك.. بتكتب اسمك الثلاثي واسم الأب والأم بالخانات المخصصة
بعدين الرقم الامتحاني بتكتبوا بخانته كمان
في مربع للرقم الامتحاني بنص الورقة من فوق... لا تتلبك مشانو.. بيعلموكن كيف تظللوه.

بتسمي بالله وبتبلش بالأسئلة.. الوقت 90 دقيقة وهنن 100 سؤال... لا تخاف انت متدرب منيح وحالل مئات الأسئلة من قبل.
بتقرأ السؤال الأول ومن أول مرة بتركيز وبتفهم شو طالب منك وبتقرأ الخيارات كلها للأخير حتى لو بتعرف الاجابة بعقلك.. بتاخد جواب السؤال الأول فرضاً A.. بترجع لورقة الإجابة.. طابق فيها رقم السؤال مع الإجابة... يعني بتحط ببالك السؤال رقم 1 جوابه A وبتظلل المربع A.. لا تخربط بالتظليل يرضى عليك وتروح تضيع علامات وتعب ليالي بالتظليل.. ركز شوي واعرف شو عم تظلل وشو بدك تظلل.
وهيييك لتوصل لآخر سؤال.

هلأ في كم نصيحة بدي قللكن ياها :

السؤال اللي ما بتعرفو او اللي بتحسو بدو تفكير كتير اتركو فوراً واكتب رقمو عالمقعد مشان ترجعلو او حط حواليه اشارة ع ورقة الأسئلة (ما تحط الإشارة ع ورقة الأجوبة.. انتبه!)
بعدين بترجعلو بالأخير اذاضل معك وقت (ورح يضل معك وقت بإذن الله)
ووقت بتنتقل للسؤال اللي بعدو انتبه لشغلة المطابقة بين السؤال وجوابو.. يعني مثلاً انت طفيت السؤال 35 وما ظللته.. وصرت بالسؤال 36... مو تروح تظلل جواب السؤال 36 بخانات السؤال 35.. دير بالك وانتبه مشان ما تضيع علاماتك بالهوا. 

دائماً تذكر تطابق السؤال مع جوابه وقت بدك تظلل.

مشان التظليل... السؤال اللي متأكد منو فوراً ظلله بالأزرق.. اذا كنت متأكد منو بس... ولا تظلل كل المربع بالبداية مشان السرعة.. ظلل شوي من المربع وبس تخلص ورقة الأسئلة بترجع عالمربعات وبتظللها كلها... هي مشان توفر وقت.
السؤال اللي مانك متأكد منو او حاسس حالك بدك تغير اجابتو هاد بتحلو بالرصاص وبعدين بتظلله بالأزرق بس تخلص وتتأكد. 

اذا في سؤال مظلل فيه مربعين فهون بتروح علامة السؤال.
أهم شي لا تتلبك.

نسأل الله لنا ولكم التوفيق أجميعن.
لا تنسونا من صالح دعائكم..
والسلام عليكم