المقال التعريفي الثاني للوراثة

استكمالاً لمقال مبارح
رح احكي هلأ لمحة بسيطة عن كل فصل والوقت المقدر لدراسة كل فصل... ياريت قبل ما تقرأه هالكلام تفتح المقال وتقراه..

الفصل الأول : وسط.. طويل شوي.. بدايته بكالوريا.. بيحكي عن ماندل والوراثة الجسدية السائدة والمتنحية (الوراثة المندلية) ... فيه شوية أفكار معتّة بالبداية بخصوص التفارز المستقل والارتباط الجيني..
الفصل فيه الشجرات الوراثية.. مهمات كتير ولازم تفهموهن ما تبصموهن.. هاد الفصل بيتعلق بالفصل 11 بخصوص الشجرات الوراثية..
جداول الأمراض مهمة.. بتحفظ كل مرض شو نوع توريثه وأعراضه.. نسب انتشار الأمراض اللي بالجدول ما مهمين.
الزمن المقدر لدراسة الفصل هو :يوم


الفصل الثاني : قصير وسهل وحلو.. هو استكمال للفصل الأول.. بيحكي عن الوراثة اللامندلية.. الوراثة عديدة العوامل وعديدة الجينات والوراثة المُتَقدّرية واضطرابات كل وحدة منن.

الزمن اللازم لدراسة هالفصل هو 6 ساعات بالكثير.. مع دوراته كلها كمان.

الفصل الثالث : هاد الفصل من أسهل فصول الكتاب.. غالبيته مر معكم بالفصل الرابع بيولوجيا
بيحكي عن بنية الأحماض النووية وبيتطرق لآلية تصنيف الصبغيات وتسميتها حسب النظام العالمي لتسمية الصبغيات ISCN.
الوقت المقدر لدراسة هالفصل هو 4 ساعات...
يعني فينك تدرس الفصلين 2 و3 بيوم واحد.. 😎😎😎.


الفصل الرابع :قبل ما نحكي عنو...الفصول 3 و4 و5 و6 مترابطة وبتندرس سوا..
هاد الفصل بيحكي عن تضاعف (تنسّخ) الدنا.. انتبه!ليس انتساخ الدنا! بدك تفرق بين تنسخ وانتساخ
الانتساخ بيعطيني mRNA.. أما التنسخ فبيعطيني DNA تاني.. يعني هاد بيصير بالطور S من دورة حياة الخلية.

الفصل سهل نسبياً.. فيه كم فكرة شوي بحاجة لتوضيح بسيط.. الوقت المقدر لدراسته هو 6 ساعات مع الدورات..

الفصل الخامس :هاد الفصل بيحكي عن الانتساخ.. من بدايته لحتى وصول الmRNA للسيتوبلاسما... بيتطرق لكل الآليات اللي بتصير خلال هي المرحلة.. فصل مهم امتحانيا وفيه شوية صعوبة وبعض النكشات..
بحاجة لتركيز منيح..
شوفله كم فيديو عالنت وبيفرط الفصل معك..
الوقت المقدر للدراسة هو :يوم... لازم تشوف اليوتيوب هون.. معلش، ضحّي بباقة النت شوي 😂💔..
ولا تنسى تدرس الدورات بعد ما تخلص الفصل عزيزي الطالب الفارش المتنردن😬


الفصل السادس : هاد الفصل هو تتمة للفصل 5..بيحكي عن آلية ترجمة الرنا المرسال.. في منه أفكار منيح بالبيولوجيا..
مستواه وسط.
الوقت المقدر للدراسة هو :يوم.. كمان اليوتيوب مهم بهالفصل.

ملاحظة :الفصول 3و4 و5 و6 و7 بيندرسوا ورا بعض..
وفهم كل فصل هو أساس لفهم الفصل اللي بعدو..
والفصل 7 ما بيندرس إلا اذا كنت فهمان ال4 وال5 وال6.. ولو إنو ما في كتير ترابط بين ال7 واللي قبله.. بس لازم تفهم الأساس قبل ما تبلش بالسابع..

الفصل السابع :الجلطة الحقيقة 😬.. هاد الفصل أول ما بتفتحه بتسكره اذا ما كان عندك صبر عليه.. واحتمال تنام فيه وتسبح كتاب الوراثة بسببه.. الفصل صراحةً صعب.. وبيجي بالمرتبة الثانية بالصعوبة بعد الفصل 8 اللي بيحتل المرتبة الأولى بجدارة..
هاد الفصل بس فهمته رح تعشق كتاب الوراثة وتجيبها معدل.. وبس فرشت فيه رح تفرش بالوراثة 😐..

لا مو لهالدرجة 😅.. بس الفصل صعب وبدو شغل منيح.. وهو أحلى فصل بالكتاب كلو هو والفصل 8 (بعد المعاناة والكره بتحبو)
الفصل بيحكي عن تنظيم التعبير الجيني.. ما رح احكي عنو هلأ أكتر...
بيحتاج لشرح.. وبإذن الله رح اشرحه أنا..
يُذكر إنو قائد فريق سوبر نيرد - أنا يعني- عانى منه كتير وكره حياتو من وراه.. بعدين صار بدو يشرحو ويسهل الطريق على غيره وينهي هالمعاناة بشكل كلي 😬😅😎.

الفصل بحاجة ليومين دراسة بشكل جدي.. ويوم نص عند الزنقة.. ويوم اذا كنت أنا شارحو😎..
طبعاً هاد الوقت المعطى بيتضمن حل أسئلة الدورات كمان.