مادة البيولوجيا-محبوبة الفريق😎-...هي المادة اللي غالبكن رح يلاقيها أقرب مادة بالفصل الأول ع المجال الطبي
الكتاب مؤلف من 12 فصلاً، وهي المادة الوحيدة اللي ما فيها حذف أي حرف من الكتاب على غرار باقي المواد ... الها ملف تصويبات فقط
عن شو بتحكي المادة؟ 🤔
المادة بتحكي عن الخلية بكل تفاصيلها... من غشاء الخلية لعضيات الخلية وصولاً للنواة ،ومن ثم كيفية ارتباط الخلايا مع بعضها وتشكيل الأنسجة، وكيفيةتصنيع الطاقة في معامل الطاقة (المتقدرات والصانعات) في الخلايا الحيوانية والنباتية والانقسام الخلوي بنوعيه المنصف والخيطي ... هاد الحكي كلو رح يكون عن الخلايا بدائية النوى والخلايا حقيقة النوى.
مستوى المادة:
إجمالاً .. المادة مستواها من متوسط إلى صعب ... صعبة بالدور الأول لإنها مادة تراكمية ومعلوماتها تكاملية؛ فهي بحاجة إلى ترتيب أفكار كل فصل لاحق مع أي فصل سابق - بوجود بعض الاستثناءات-.... رح تشعروا إنو المادة غليظة ومملة بالدور الأول..لكن مع الصبر والمتابعة وتكوين هرم أفكار الخلية رح تلاقوها جداً جداً ممتعة .
مستوى أسئلة الامتحان بالعادة بيجي مقبول . مانو صعب كتير ولا سهل كتير .. بس ع دور الدفعة الرابعة كانت الأسئلة مبنية على الفهم والحفظ المتين وربط أفكار الفصول مع بعضها .. كانت صعبة بس العلامة فوق ال90 جدا منطقية وكتيرين جابوها بال90ات😍 وطبعاً فريقنا منن 😎
مصادر الدراسة : دائماً مرجعكم ودليلكم ومصدركم الأساسي هو الكتاب وبس .. ممكن تستعينوا بأعمال الفرق التطوعية وخاصة فريق ال RBCs لإيضاح بعض الأفكار أو لتنسيق أخرى أو لإضافة صور تغني المعلومات .. وخاصة للفصل 3 و4 و8 و11
أسلوب الدراسة : البيولوجيا مادة فهمية وحفظية سوا.. بدك تفهم وتتخيل وتغني ذاكرتك الصورية بعدين تحفظ .. بصم من دون فهم ما رح يجيبك ال60 وبنفس الوقت فهم من دون حفظ ما رح يجيبك ال60 كمان ... لإن الأسئلة فهمية وحفظية سوا.
المادة مليئة بأسماء المركبات الكيميائية (بروتينات، أنزيمات، شحوم بأنواعها، سكريات، أحماض أمينية .....) لازم تحفظهن منيح منيح.😐
بيبقى عنا بعض الملاحظات :
الفصل الأول مستواه سهل وبيشبه العلوم أيام المدرسة.
الفصل الثاني يُعتبر نقلة نوعية بالمقارنة مع الفصل الأول ... هاد الفصل رح تستصعبوه بدايةً بس ان شاء الله كلشي فيه رح نشرحوا...غالبية الطلاب بيتركوا الفصل لبعدين وبيروحوا عالفصول الأقصر متل السادس والخامس... للأسف هي قمة الغلط ... الفصل التاني تأسيسي للكتاب ككل .. يعني بلشت فيه ما بتروح لغيرو لحتى تخلصه.🤕
